На школьнай эмблеме знаходзяцца як чыста геральдычныя элементы, так і некаторыя атрыбуты адукацыі і выхавання. Да геральдычных элементаў можна аднесці ўзыходзячае сонца і шчыт прамавугольнай формы, на якім зроблены надпіс. Школьнае жыццё своеасабліва сімвалізуюць разгорнутая кніга і сам будынак школы.

Галоўнаю часткаю эмблемы з’яўляецца разгорнутая кніга, якая сімвалізуе крыніцу ведаў і паўстае асноваю ўсялякага пазнання, інструментам набыцця ведаў і перадачы вопыту ўсяго чалавецтва. Разгорнутая кніга азначае, што школа, як і ўся наша адукацыя, з’яўляецца адкрытаю для кожнага чалавека і выступае бясконцаю крыніцаю ведаў, сімвалізуе бясконцасць і няспыннасць працэсу набыцця ведаў і чалавечага самаўдасканалення. Кніга на эмблеме таксама напамінае кожнаму чалавеку яго самую першую дзіцячую кніжку, яго самыя першыя крокі школьнага жыцця, напамінае буквар і іншыя падручнікі, якія з’яўляюцца вернымі і надзейнымі памочнікамі і дарадцамі кожнага вучня, яго найлепшымі сябрамі.

На фоне разгорнутай кнігі паказаны будынак школы. Гэта надае эмблеме сваю адметнасць, абазначае прывязанасць малюнка да пэўнага аб’екта і вылучае яго з іншых аб’ектаў адукацыі. Будынак школы сведчыць пра вялікія, слаўныя і моцныя традыцыі, якія пакінулі сваім наступнікам усе папярэднія пакаленні вучняў. Сведчыць пра неабходнасць памнажэння лепшых здабыткаў бацькоў і дзядоў. Ён таксама адмыслова гаворыць усім вучням, што неабходна шанаваць і любіць сваю школу, імкнуцца зрабіць яе прыгажэйшай, што патрэбна ўсяляк берагчы ўсю школьную маёмасць.

Школьныя вокны паказаны схематычна, яны маюць блакітны колер і глядзяць на вучняў, нібы пяшчотныя вочы маці. Яны ўвасабляюць цесную повязь школы з усімі яе гадаванцамі і напамінаюць пра сыноўскі абавязак усіх вучняў у адносінах да сваёй школы і да сваёй маці. Вокны заклікаюць усіх ніколі не забываць пра сваю родную школу, наведваць яе і быць ёй удзячным на працягу ўсяго жыцця.

Унізе змешчана назва горада. Яна абавязвае ўсіх вучняў ведаць пра сваё паходжанне, ведаць гісторыю свайго горада і свайго роду, адчуваць непарыўную сувязь з роднаю зямлёю. А гэта патрабуе ад кожнага чалавека быць патрыётам нашай Радзімы, нашай зямлі і свайго горада. Патрабуе таксама добрага ведання традыцый і звычаяў беларускага народа, яго багатай шматвяковай гісторыі, неацэннай культурнай спадчыны. Змешчаны ўнізе надпіс сведчыць, што сям’я, горад і Радзіма з’яўляюцца нашым фундаментам і нязменным духоўным апірышчам кожнага вучня і кожнага чалавека ўвогуле. З гэтага фундамента і вырасла школа і сама адукацыя.

Блакітны колер на эмблеме сімвалізуе прыгажосць беларускай зямлі, нязменнае хараство Палесся з яго цудоўнымі краявідамі. Гэта колер паўнаводных рэк, хвалі якіх спрадвеку плешчуцца аб берагі ў ваколіцах Давыд-Гарадка, колер вялікіх і маленечкіх азёраў, якіх так многа на абшарах Пагарыння. Блакітны колер – гэта колер лагоднага мірнага неба над усімі людзьмі, колер чалавечага спадзявання, якое з’яўляецца вечным людскім спадарожнікам.

Над разгорнутаю кнігаю змешчана ўзыходзячае сонца, у залацістых праменнях якога зроблены надпіс, які засведчыў агульнаўжывальную назву статуса школы. Ніжэй, на сонечным дыску, пазначаны нумар школы. Узыходзячае сонца над кнігаю – гэта сімвал святла і асветы. Менавіта святло і асвета выпраменьваюцца кнігай і школаю. Менавіта ад школы, нібы ад сонца, разыходзяцца па ўсім свеце праменні ведаў і асветы. Вучні за час навучання павінны глыбока засвоіць усе прадметы і мець трывалыя веды. Сонца таксама з’яўляецца сімвалам светлай будучыні і вялікай перспектывы выхаванцаў школы.